Kanariar Irlak eta Euskal Herria batuko ditu Urmugaren Urtantak, mugak igarotzen bizitza galtzen duten migranteen memorian 

Irunen, 2026ko maiatzaren 18an. Gaur aurkeztu dute Irunen Urmugaren URTANTA 2026, musika eta mendia uztartzen dituen ekimen artistiko eta herrikoia. Zazpigarren edizioa izango du aurtengoa eta berezitasun askorekin dator. Euskal Herriak eta Kanariar Irlek partekatzen duten gai bati helduko diote: bere bizitza mugak igarotzen galtzen duten mingranteena. Hiru urte dira Kanariar Irletako Contramapas egitasmoa (Urmugaren kanariar ahizpa) eta Urmuga proiektua elkarlanean ari direla lurraldeak eta jendea josiz. Elkarlan horren emaitza izango da aurtengo Urmugaren Urtanta.

Honela, muga administratiboek eta fisikoek pertsona migratzaileentzat suposatzen duten oztopo gaindiezina ikusaraztea izango du ardatz. Afrika eta Europa (Euskal Herriak eta Kanariak)   batuko dira, horrela, elkartasun mezu unibertsal bat eskainiz. Lehen zatia Kanariar irletan egingo da, maiatzaren 24tik ekainaren 1era. Bigarrena, Euskal Herrian, uztailaren 17tik 25era.

Kanariar Uharteak: Hego mugari begira Maiatzaren 24tik aurrera, beraz, espedizioak La Palma uhartea zeharkatuko du, eta, maiatzaren 30ean, Kanariar Uharteen egunean, El Hierroko Puerto de la Restingan (Estatuko hego mugan, “Estatu espainiarreko Lesbos” deitutakoan) amaituko da. Bertan, itsasoan bizitza galtzen duten pertsona migratzaileen oroimenezko ekitaldi nagusia egingo da. Emanaldian parte hartuko dute Benabas talde senegaldarrak, Arife taldeak, Rogelio Botanzek, Percuteras de Garaldeak eta Et Incarnatus Orkestrak. Ekimen honen bidez, kaiukotan iristen diren migratzaileen eta babesik gabeko adingabeen errealitateari ikusgarritasuna eskaini nahi zaio, kultura eta elkartasuna ardatz hartuta.

Euskal Herria: Ipar mugaren gordintasuna.  Bidasoan Uztailaren 17tik 25era bitartean, Euskal Herriko mendi eta ingurune naturaletara itzuliko da Urmugaren Urtanta. Aurten, Euskal Herria Frantziako eta Espainiako estatuen artean banatzen duen barne-mugak berebiziko garrantzia izango du, bereziki Bidasoa inguruak. Mendi ibilaldiak eginen dira, egunero, eta

Kontzertu eta ekitaldi esanguratsuenak hauek izango dira:

• Uztailak 17, Ibardingo lepoa eta Manttale artean (Urruña – Bera): Herri Kanta kontzertua ospatuko da Et Incarnatus Orkestrarekin, Easo Abesbatzarekin eta kaleko kantu taldeekin, Anabel Arraizaren gidaritzapean. 43°18’40.50″N 1°41’50.30”W

• Uztailak 18, Irun: Santiagotarrak Arraun Elkarteak antolatutako Bidasoa ibaiaren jaitsierarekin bat egingo du ekimenak, muga igarotzean bizitza galtzen duten migratzaileen memorian. Bertan, Albaolako Patatxak ere parte hartuko du. Amets Arzallusekin egingo da hasierako ekitaldia, eta amaieran, paduraren aurrean, Mugarri, Otxo, Rogelio Botanz, Jokin Lasa eta Et Incarnatus izango dira.
  
• Uztailak 19, Errenga mendia (Lesaka – Oiartzun): Aritxulegi inguruko parajean, Janus Lester, Irune eta Itsaso Elizagoien, Benabas, Odei Barroso, Garazi Esnaola, Rogelio Botanz, Percuteras de Garaldea eta Et Incarnatus Orkestra arituko dira. Lesakako irteeran Lesakako Koruak kontzertua eskainiko du. 43°15’24.35″N 1°47’30.78”W

Baina ez da hor bukatuko aurtengo Urmugaren Urtanta. Ibilbideak Araba eta Bizkairako bidea hartuko baitu. Bi egun gehiagotan izango dira zeharkaldiak eta musika emanaldi ederrak. Hauek izango dira:

• Uztailak 24, Artomaña eta Delika (Araba): Et Incarnatus Orkestra eta gonbidatuak izango dira bertan. Lehendabiziko Jaurlaritzaren sorreraren 90.urteurreneko oroitzapenean garaiko musikak presentzia nabarmena izango dute. Egunean zehar

kokapen desberdinetan eskainiko dira orkestra musika emanaldiak: 12:00 piano biolin emanaldia.18:00tan Et Incarnatus Orkestra eta Mikel Urdangarin. Amaiera kontzertua Et Incarnatus Orkestrak Artomaña txakolindegian eskainiko du 20:00etan.

• Uztailak 25, Urduña (Bizkaia): La Antiguako Santutegiko Lorategian erromeria kontzertua egingo da. Kepa Junkera ohorezko gonbidatua izango da, eta harekin batera, Uxue Kerejeta, Gorka Hermosa eta herriko dantzari zein musikariak arituko dira Et Incarnatus Orkestrarekin batera.
  

Zeharkaldi guztietan zehar errespetua izango da ezinbesteko baldintza, naturaguneekiko oreka eta jasangarritasun irizpideak zainduz. Era berean, irisgarritasun mugatua duten pertsonen partaidetza bermatuko da Mendi Solidarioak taldearen eskutik.

Sarrerak eta Laguntzaileak Urmugaren Urtanta 2026ko kontzertuetarako sarrerak ekaina bukaeratik aurrera egongo dira salgai proiektuaren webgune ofizialean: www.urmuga.eus.

Ekimen hau posible izan da erakunde eta eragile hauen laguntzari esker: Gipuzkoako Foru Aldundia, Bizkaiko Foru Aldundia, Eusko Jaurlaritza, Nafar Gobernua, Arabako Foru Aldundia, Irungo Udala, Oiartzungo Udala, Berako Udala, Lesakako Udala, Orduñako Udala, Amurrioko Udala, Laboral Kutxa eta Berria.

Eider Mendozak, Gipuzkoako diputatu nagusiak, “txalotu eta eskertu” nahi izan du Urmugaren Urtantak Kanariar Uharteei, Bidasoari eta migratzaileen errealitateari “begirada eta egitarau sakona” eskaintzeko hartutako erabakia. “Elkartasun ur tanta hauek zipriztindu dezatela Atlantikoa, zipriztindu dezatela El Hierroko irla, zipriztindu dezatela Bidasoa eta zipriztindu gaitzatela gu, herritar guztiok, herritarren eta pertsonen arteko berdintasunezko eta justiziazko loturak sortuz. Izan dadila Urtanta gure herriak ezaugarri duen elkartasun eta berdintasun balioetan sakontzeko parada”, opatu die antolatzaile eta parte hartzaileei.